DIE Veremark-orrelvereniging en die Cantando@Algoa-koor sal Vrydag ’n fees van orrel-, koor- en trompetmusiek aanbied om die 30-jarige bestaan van die NG Kerk Somerstrand se orrel te vier.
Die konsert, getiteld Lofsange!, sal ook drie kore se opvoerings insluit. Hulle is die Cantando@Algoa-koor onder leiding van Bouwer van Rooyen, die Hemiola-Kamerkoor onder leiding van Rochelle Oelofse en die Cantatori-Mannekoor onder leiding van Ansie Kotzé.
Albert Troskie, Bouwer en Marilise van Rooyen, en Rina Ras is die vier orreliste wat gaan optree. Vier dirigente en ook trompetspelers sal ook deel van die geleentheid vorm.
Kore uit die omgewing sal by die ander drie aansluit om die konsert met massakoorsang af te sluit. Die gehoor sal ook in die samesang deelneem.
Lofsange! sal op 31 Augustus om 18:00 in die NG Kerk in Louis Bothasingel 77, Somerstrand plaasvind. Orrelspel begin reeds om 17:40.
Toegang is gratis, maar kollekte sal opgeneem word.
Vir enige navrae kontak Albert Troskie by 082 726 9595.
– MEDEWERKER