Publications
Partners
DIE Valke se kommersiële misdaadondersoekeenheid in Port Elizabeth waarsku mense teen vervalste R100-note wat in omloop is.
Die eenheid sê ook verbruikers moet hul geldnote noukeurig ondersoek.
Die waarskuwing volg nadat ’n klagte van vervalste R100-note op 7 September by hul kantoor in Port Elizabeth ingedien is, het kapt. Anelisa Feni, Valke-woordvoerder, luidens ’n verklaring gesê.
Die klaer in die saak het na bewering sy skootrekenaar aanlyn as te koop geadverteer en ’n buitelander het op die advertensie gereageer.
Die buitelander het glo geld by ’n kitsbank onttrek en die geld as betaling vir die skootrekenaar aan die klaer oorhandig.
“Toe die klaer die geldnote by ’n OTM probeer deponeer, het die masjien die note verwerp.”
Beamptes van die kommersiële misdaadondersoekeenheid het die geldnote onder oë gehad en die geldnote as ’n vervalsing van die ware Jakob bestempel.
Feni het toegegee dié vervalste geldnote is van ’n hoë gehalte.
“Die publiek word versoek om ten alle tye waaksaam te wees en geldnote vir kenmerke van egtheid te ondersoek.”
’n Maklike kenmerk om te identifiseer, is die diepdrukwerk wat op geldnote gevoel kan word wanneer jy jou vingers daaroor vryf, sê Feni.
Dié drukwerk is aan die voorkant van die noot waar die wapen is: die vier lyne aan die kantlyne, die woord “governor” en die handtekening, en die getal (100 in die geval van ’n R100-noot) links onder.
Feni sê enigiemand wat die polisie in die ondersoek kan bystaan, kan hul kantoor gedurende werksure by 041 408 2600 skakel.
– CARA-LEE DORFLING
