VERSKEIE sepiesterre en gewilde sangers gaan vanjaar by die 31ste jaarlikse Uitenhage Straatkarnaval optree wat op 30 November en 1 Desember gehou word.
Die karnaval word deur die Uitenhage Rotariërklub gereël en bied geleentheid aan plaaslike nie-winsgewende instansies om fondse in te samel deur kosse of gebruiks-items te verkoop. Stalletjiehouers van oral oor die land is ook jaarliks by die fees teenwoordig.
Vrydag, 30 November gaan Suidooster-sepiesterre Eden Classens, Dean Smith, Marco September en Gntane Kusch by die fees kuier. Die gewilde Early B is die groot aantrekkingskrag van die aand se program sowel as Stef the Hypnotist, wat ook op dié aand karnavalgangers se monde gaan laat oophang met sy truuks.
Saterdag, 1 Desember is DJ Cndo, Nadia Herbst en Wicus van der Merwe van die groot name wat op die verhoog te sien gaan wees.
Ander aktiwiteite sluit in ’n reuse speelpark van Amusement for Africa, speletjies, treintjie wat deur die karnaval ry en ’n speelarea vir kinders.
- Die karnaval word deur die Uitenhage Rotariërklub aangebied. Vir meer inligting of om stalletjies te bespreek bel Mia Smit 072 457 1181. - HEILIE COMBRINCK