Jong vrou sterf ná longoorplanting

VANESSA Neveling (25) van Uitenhage het Saterdagoggend in die Groote Schuur- hospitaal gesterf nadat sy onlangs ’n dubbele longoorplanting ontvang het.

Vanessa het op 16 Augustus, ná meer as 100 dae in die hospitaal en byna drie maande op ’n waglys vir ’n nuwe stel longe, uiteindelik die operasie gehad.

Sy was skaars drie maande oud toe sy met sistiese fibrose (SF) gediagnoseer is. SF is ’n genetiese siekte wat mettertyd tot ernstige asemhalingsprobleme lei.

Peter Neveling, haar pa, het gesê soos sy dogter ouer geword het, het die probleme al meer uitdagend geword.

Vier jaar gelede het dokters ’n longoor-planting aanbeveel.

“Maar sy het nooit tou opgegooi nie,” sê haar pa.

Sy is in Junie vanjaar op die waglys geplaas nadat sy met dokters by die Groote Schuur-hospitaal in Kaapstad gekonsulteer het.

Ná haar dubbele longoorplanting is Vanessa in ’n geïnduseerde koma geplaas sodat haar nuwe organe kon aanpas, rus en gesond word, sê Neveling.

Maar Vanessa het tien dae later gesterf.

Vanessa was ’n voorstander van orgaanskenking en het tot kort voor haar dood mense aangemoedig om as skenkers te registreer.

“Om vir iemand ’n geskenk van lewe te gee, is die grootste geskenk,” het Vanessa kort voor haar operasie gesê. - NETWERK24