Liedjie oor Despatch gewild op radio

Dis lekker hier op Despatch ... met rugby, braaivleis, dans, tannies op Facebook en be-kendes soos Danie Gerber en Eleandré wat van dié Oos-Kaapse dorp af kom.

Dit is van die dinge waaroor Lari-Elle Truter (11) sing in haar liedjie getiteld “Hier op Despatch” wat gereeld op Luister!FM gehoor word en wat onder Goue Drome se top 10 musiekranglys is.

Haar ouma, Marie Gair, het die liedjie vir haar geskryf.

“Ek wou iets vir Lari skryf waaroor ek positief voel, want sy is absoluut ’n tonic vir my. Toe dink ek maar skryf oor Despatch, want dit is lekker hier op ons dorp. Ons is trots op wat ons het en Despatch se mense is anders en ons gee om vir ons dorp,” sê Marie.

Lari-Elle wat in graad 5 by Laerskool Frans Conradie is, was van kleintyd af lief vir sing en dans.

“Sy was mal oor die Campbells se liedjie Bietjie Bietjie Lam en het in haar doekedratyd gestaan en dans as die liedjie gespeel het. Partykeer sommer sonder die doek,” sê Marie.

Op 6-jarige ouderdom het sy met Snotkop se Song vir my Dad haar eerste verhoogoptrede gedoen. Deesdae is sy ’n sangstudent by Stiaan Fourie van Musical School of Talent en sy neem kitaarlesse by Tania Gerber by Laerskool Frans Conradie.

“Ek sal graag eendag elektriese kitaar wil speel. Ek hou van Eleandré en Leah se musiek,” sê Lari-Elle.

Sy sê daar is ’n plan om ’n video van die liedjie op Despatch te skiet en dat sy deur die dorp gaan loop en sy wil graag vir Danie Gerber ook in die video hê.

“Ek gaan nie ons geheime oor die video nou vertel nie, julle moet maar kyk, dit gaan awesome wees,” sê Lari-Elle.

Lari-Elle is die oudste dogter van Danny en Larissa Truter van Despatch.

Sy tree Sondag by Open Sky op. Later die jaar gaan sy in die voorprogram vir Riana Nell en Elvis Blue optree met hulle besoeke aan Vintage Bar op Uitenhage.

Lari-Elle nooi haar aanhangers uit om vir die liedjie op Goue Drome te stem en om haar op Facebook te volg.