ELKE derde uur moet Fayden Plaatjies (13) voeding deur sy maag kry. Om dié proses makliker te maak is ’n voedingsmasjien nodig en om dít aan te skaf word ’n sangaand gehou om fondse in te samel.
Fayden is serebraal-gestremd en die oudste kind van Danwin en Ursula Booysen van Uitenhage. Die egpaar se ander kinders is Sharonique (5) en Isaiah (3).
’n Mediese prosedure is verlede jaar op Fayden gedoen om ’n voedingsbuis in sy maag te plant omdat dit vir hom al hoe moeiliker geword het om te sluk.
“Ons maak beurte om elke drie uur Fayden deur die buis direk in sy maag sy 200 milliliter kos te voer. Maar as ons die voedingsmasjien kan kry sal hy outomaties en op tyd gevoer word,” sê Danwin Booysen, ’n evangelis is by die PPK Uitenhage-kerk in Rosedale.
Volgens Ursula is dit veral in die nag wat die voeding ’n probleem is. Dan stel hulle die alarm sodat een van hulle, of van die familie wat ook help, elke drie uur opstaan om Fayden te voer.
Die voedingsmasjien wat Fayden benodig is ’n Kangaroo ePump en dit kos ongeveer R7 000. Dit moet in Johannesburg by Chart Technology International bestel word.
Volgens Danwin is daar baie serebraal gestremde kinders in die gemeenskap wat hulp nodig het.
“Ons het ’n mammie ontmoet wat daar in die vlak bly. Sonder krag en water in die huis versorg sy haar serebraal gestremde kind.
“Daarom wil ons volgende jaar ’n groot konsert hou om ook die ander mense met serebraal gestremde kinders te help. Voor dan wil ons al dié huishoudings identifiseer waar daar serebraal gestremde kinders is. Dan kan ons presies weet vir wie en hoeveel kinders ons gaan fondse insamel,” sê Danwin.
Sangaand vir Fayden
’n Groep plaaslike sangers sowel as gaskunstenaars uit Kaapstad gaan Sondag, 12 Augustus om 18:00 optree in die United Pentecostal kerksaal in Kersogiestraat.
Kaartjies is R50 per persoon en is beskikbaar by Agape Coffee Shop of by Danwin.
Die sangers wat gaan optree sluit in Universal Voices, Ruben Davids (van Kaapstad), Trinity Dancers, Delivia Sampies, Elsimio Smit, Wessel Williams (trompetspeler), Palace of Praise Band, Gaynor Boligelo, Kayla Frolick en Minister Lon. Fayden se pa, Danwin, gaan ook optree.
- Vir meer inligting of om die fondsinsameling te ondersteun, bel Danwin Booysen by 061 213 9820 of e-pos danwin@cbwfs.co.za