’n SKRYWER van Uitenhage, Nico Schamrel, is een van 20 Croyez skryfkompetisie-wenners wie se kortverhale in ’n keurbundel opgeneem is.
Dié literêre toekenning het Schamrel te beurt geval vir sy kortverhaal By Mooirivier se Brug wat nou in die keurbundel ’n Sussie vir Simoné verskyn. Dit word deur Croyez vrygestel en is in boekwinkels beskikbaar.
“Die verhaal handel oor twee jong plaas-seuns, Basie en Boitjie, wat mekaar beloof om elke dag op die brug te ontmoet,” het Schamrel gesê.
“Die brug is die naelstring wat die mooiste vriendskap voed, maar wat gebeur wanneer die brug wegspoel?”
Daar is slegs 20 kortverhale uit honderde inskrywings goedgekeur vir die keurbundel. Van sy kortverhale verskyn ook in die keurbundels Vlerke en Ses Dae.
Schamrel is ’n stigterslid van die bekende PENdit.za skrywersblad op Facebook. Die medestigters is Ronel Dunn en Bets Koen en hulle het die blad gestig ter bevordering van die Afrikaanse verhaalkuns. Die blad bied geleenthede vir talentvolle en ook beginskrywers om hul werk te publiseer en deel te neem aan verskeie uitdagings.
PENdit.za verskaf proefleesdienste en bied ‘n slypskool aan wat deur Dunn en Koen gefasiliteer word.
Volgens Zalman Davies, voorsitter van die Croyez Literêre-toekenning, streef hul daarna om opkomende skrywers die geleentheid te bied om hulle werk gepubli-seer te kry.
Die keurbundel ’n Sussie vir Simoné kan bestel word deur ‘n e-pos te rig aan croyezlitaward@classicmail.co.za. Die PENdit.za keurbundel Vlerke en Ses Dae kan bestel word by info@pendit.co.za.
“Deur ons skrywers te ondersteun, ondersteun jy Afrikaans. Niemand kan jou taal van jou weg-neem nie.
“Dit is jou erfenis,” het Schamrel gesê.