Uitstalling van kuns en dekor om te bekoor

TWEE dominees, ’n orrelis-bakker en ’n bemarker ... wat het hulle in gemeen? Kuns.

Dié viertal met ’n liefde vir kuns en dekor, ds Christo Stumke, ds. Adelle Strauss, Eugene Barnard en Nadia Barnard gaan eerskomende Saterdag ’n Kuns & Dekor uitstalling aanbied van 09:00 tot 14:00 in die NGK Rietief-kerksaal op Despatch.

NGK Retief-gemeente is vanjaar 60 jaar oud en dié uitstalling is deel van die kerk se verjaardag-vieringe.

Eugene, ’n lid van dié gemeente, is ’n orrelis in die De Mist-kerk sowel as ’n sanger en ’n bakker. Sy verloofde Nadia Barnard, ook ’n lid van Retief-gemeente, is ’n bemarker en die twee is beide ywerige skilders. Dit is dié ge-deelte belangstelling wat hulle gemotiveer het om ’n uitstalling te hou met kuns en dekor-items.

Nog ’n kunstenaar van Despatch, dominee Adelle Strauss, wat met ’n eiesoortige drukkuns op kussings en materiaal begin het, is deel van die uitstalling. Om nog meer flambojansie aan die die uitstalling te verleen, gaan die ywerige kunsversamelaar, ds. Stümke, verskeie kuns-werke van bekende kunstenaars uitstal.

Daar sal kaartfasiliteite wees sowel as ’n gesellige kuier-hoek waar koffie, tee en ’n verskeidenheid koek te koop aangebied word deur die kerk se Sondagskool.

- HEILIE COMBRINCK