Publications
Partners
DIE tweede van ’n reeks unieke padwedloop- medaljes wat Despatch se geskiedenis uitbeeld word vanjaar by die gewilde plat en vinnige 10km padwedloop op dié dorp uitgegee.
Verlede jaar se padwedloop-medalje was ’n mini baksteen waarop die dorp se historiese skoorsteen uitgebeeld is. Dié klein kunswerk is eksklusief vir Despatch Atletiekklub gemaak deur Chere Schaup, ’n kunsstudent by Nelson Mandela Universiteit.
Vanjaar gaan atlete ’n replika van die bekende Despatch Patent stene kry wat ook deur Schaup gemaak is.
“Ons gee elke jaar ‘n ander medalje wat ’n stukkie geskiedenis van Despatch uitbeeld. Eers was dit ’n klein steentjie met ons steenoond se skoorsteen en nou ’n replika van die stene wat in dié oond gebak is,” sê Yvette Jonker van die Despatch Atletiekklub.
Despatch se oorsprong én naam is te danke aan die florerende baksteenbedryf in die laat 1800s. Die area aan rivierkant van die dorp is bekend vir sy kleigrond wat ideaal was vir bakstene van hoë kwaliteit.
Steengroef-masjinerie is uit Engeland ingevoer en in sy tyd was die Despatch Patent steengroef een van die mees gevorderde steengroewe in Suid-Afrika. Dit was ook die enigste baksteengroef in die gebied en daarom is baie van die ouer geboue in Nelson Mandelabaai met Despatch Patent stene gebou.
Die dorp se naam is afgelei van die Engelse woord “despatch” wat verwys na die stene wat vanaf ’n stasie langs dié baksteengroef na Port Elizabeth versend is. Uit volksmond is daar met tyd na die stasie as Despatch verwys. Soos die stasie dorp geword het, het dié naam gebly.
- Die 10km Despatch Padwedloop word op 1 September aangebied en daar is ook ’n 5km pretloop. Beide items begin en eindig by die Despatch SUPERSPAR met die 10km wat om 07:00 begin en die 5km om 07:15. Inskrywings is by Despatch SUPERSPAR beskikbaar. Vir meer inligting bel Helgard Potgieter 084 606 5601.
