Publications
Partners
VICTORY Raceway se vinnige vroue van die Pinkrods-afdeling het hul resies-oorpakke eenkant geskuif vir deftige aandrokke om hul jaarlikse prysuitdeling by te woon.
Uitenhager Leoné Liebenberg wat vanjaar vir die eerste keer in dié afdeling begin deelneem het, was die ontvanger van al die pryse. Sy het trofeë ontvang as Pinkrod Klubkampioen, Belowendste Drywer, Beste Voorbereide Kar en die Dankie vir Ondersteuning-trofee.
Die Pinkrod-afdeling is slegs vir vroue en ’n afdeling wat vir liefda-digheid jaag.
Vanjaar het hulle fondse ingesamel vir kinders met kanker. Elke wedren waaraan hulle deur die jaar deelgeneem het se fondse het aan ’n kind gegaan. Die meeste wat per wedren ingesamel is, was R13 000.
“Op die baan jaag ons mekaar want daar gaan dit oor wen. Maar van die baan af, is ons mekaar se beste vriende,” sê Leoné Liebenberg, Victory Raceway se Pinkrod Klubkampioen vir 2018.
“Dit is ’n gevaarlike maar lekker tydverdryf, maar ons ry vir ’n doel en dit is om ’n verskil aan iemand se lewe te maak. En ons doen dit! Deur ander te help het die vriendskapsband tussen ons Pinkrods al sterkter geword.”
Leoné sê sy sien uit na die 2019 seisoen en glo dat hulle dan nog meer kinders sowel as mense in nood kan help.
“Dankie aan almal wat ons ondersteun en so help om ’n verskil te maak aan iemand wat dit nodig het,” het Leoné gesê.
Hulle eerste wedren vir 2019 is op 19 Januarie by Victory Raceway en dit is die Curt Alchin Memorial wedren.
- Vir meer inligting oor die Pinkrods bel Vicky Gillmer by 041 991 0309.
