DIE eerste vlugbal-wedstryde in vanjaar se Nelson Mandelabaai Burgemeesters-kompetisie (Mayoral Cup) word eerskomende na-week in die Uitenhage Binnehuise-sportsentrum gespeel.
Plaaslike vlugbalklubs wat aan dié kompetisie gaan deelneem sluit in Flames, Despatch, Volkswagen sowel as ’n span van Nelson Mandelabaai-munisipaliteit.
Volgens Andrew Prins van die Nelson Mandelabaai vlugbalunie, is Volkswagen een van die gunste-linge met die voormalige Suid-Afrikaanse en huidige Oostelike Provinsie speler, Peter Size, in hulle geledere.
“Hulle kan egter sterk teenstand verwag van PE College. Hulle is die verdedigende kampioene van 2017, aangesien dié kompetisie nie verlede jaar aangebied is nie,” sê Prins.
“Die kompetisie behoort groot belangstelling onder plaaslike ondersteuners te geniet.
“Die Nelson Mandelabaai vlugbalunie bedank graag Nelson Mandelabaai-munisipaliteit vir die kompetisie. Dit gaan ’n groot rol speel om vlugbal weer een van die gewilde sportsoorte te maak wat dit eens was. Dit is ook ’n uitstekende sport om ons jeug konstruktief besig te hou,” sê Prins.
Die plaaslike spanne se afrigters is as volg: Nelson Mandelabaai munisipaliteit - Lister van Wyk; Flames - Peter Arnolds en Michael Smith; Volkswagen - Sparrow Maarman (ook afrigter van SA o.19 span) en Despatch - Mnr. Manyuka.
Vlugbal-wedstryde van die Burgemeesterstrofee begin Saterdag en Sondag in die Uitenhage Binnehuise-sportsentrum om 09:00. Wedstryde word ook op 26 & 27 Januarie en 2 & 3 Februarie daar gespeel. Die finales is op 9 & 10 Februarie in die Rosedale-sportsaal.