News24

Dansers wys liefde vir diere

2013-01-29 23:01 Hulle dans uit hul liefde vir viervoetiges.

’n Groep van meer as 100 dansers van Pretoria gaan môreaand in ’n eenmalige vertoning, Dancers Love Dogs, by die Atterbury-teater in Lynnwood dié liefde met hul danspassies bewys.

Die produksie is ten bate van die sterilisasie van honde en katte in verskeie plakkerskampe in Pretoria.

Brigitte Reeve-Taylor, ’n Kaapse danser en choreograaf, is die dryfkrag agter Dancers Love Dogs.

Sy is al 31 jaar lank ’n dansafrigter. Naas dans is haar tweede passie diere en hul welstand.

Sy het juis daarom haar teaterondervinding ingespan om ’n verskil in die lewens van mishandelde honde te maak.

Soortgelyke vertonings in Kaapstad, Durban en Johannesburg het verlede jaar R250 000 ingesamel en 1 000 honde en katte is met die geld gesteriliseer.

Reeve-Taylor se medewerker in Pretoria is Jeannette Noakes.

Dans is ook Noakes se passie.

Sy het al in verskeie produksies opgetree en rig nou by Crawford College dans af.

Die twee dansers het in 1994 ontmoet en is sedertdien vriende.

“Dié samewerking voel net reg. Drie van my katte is weggooikatte. Ek het ’n huis vol katte en honde,” het Noakes gesê.

Dansers van Crawford College in Pretoria neem môreaand aan die stuk Dancers Love Dogs by die Atterbury-teater deel. Voor is Kayleigh Goncalves en haar eie hond, Lucky, en Cinzia Warrens en haar hond, Luci. Agter is Trishanta Raman, Rebo Malebo en Robyn Theron.

Foto's: Theana Breugem