Prof. Erik Holm, ’n insekkenner, sê hul epiese trektog is eintlik ’n “fossieletrekbeweging”. Dis ’n instink wat uit ’n era van tienduisende jare gelede steeds by hulle vassteek.
Hulle volg die instink, al loop dit op hul dood uit.
Holm sê die vlinders, bekend as grasveldwitjies (Belenois aurota aurota), broei in massas uit op witgatbome in die Karoo en die Noord-Kaap.
Dit lei tot ’n oorbevolking in daardie streke en groot klompe van dié vlinders trek dan instinktief noord-noordooswaarts in die rigting van Somalië, waar daar ook witgatbome voorkom.
Tienduisende jare gelede, toe dit baie droër was, sou dié trek gewerk het, maar deesdae word die trekkende vlinders net prooi vir voëls, spinnekoppe, geitjies en dies meer.
Die noodlottige trek vind elke jaar teen Kersfees of Nuwejaar plaas.
Die interessante ding is dat daar ses maande later ’n soortgelyke noodlottige trek uit Somalië in die rigting van Suid-Afrika plaasvind.
Kliek op die grafiek vir 'n groter weergawe