’n Tienjarige meisie is Sondag in ’n brand in Roodewal oorlede.
Volgens AO Vathiswa Jacobs, ’n woordvoerder vir die Worcester-polisie, het die brand omstreeks 23:30 by die woning in Danielsstraat uitgebreek.
“Die huisgesin het aan die slaap geraak terwyl ’n kers gebrand het. Hulle het later weens die vlamme wakker geword. Die man en vrou het uitgehardloop en besef hul 10-jarige is nog binne. Die man het terug in die huis gehardloop, maar die vlamme was reeds te erg om ver te kom. Hy het met onderskeie brandwonde weer uitgehardloop,” verduidelik Jacobs.
Die meisie, Chesnique Jordaan, was ’n leerder by Esselenpark Primêre Skool.
“Esselenpark Primêr is vandag in smart gedompel deurdat ons ons pragtige maatjie, Chesnique Jordaan, aan die dood afgestaan het. Hiermee vra ons u om haar oupa, mamma en twee oorlewende sussies asook haar familie in u gebede op te dra,” het die skool Maandagoggend op sy Facebook-blad geskryf.
Volgens haar klasonderwyser en baie van dié wat op die Facebook-plasing kommentaar gelewer het, was Chesnique ’n liefdevolle meisie.
“Sy was ’n plesier om in die klas te hê. Sy was aangenaam en het altyd gehelp waar sy kon. Sy het niemand gepla nie. As sy gelag het, het haar ogies so klein geraak. Sy het ook baie vriende gehad. Die maatjies in haar klas het die nuus van haar sterfte baie erg gevat. Maandae hou ons gewoonlik byeenkoms, maar ek het toe die klas se meisietjies terug klas toe geneem en daar het ons almal ons herinneringe van Chesnique gedeel. Dit was baie mooi. Almal het iets mooi oor haar te sê gehad,” het haar klasonderwyser, Jané Carolus, met Standard & Gazette gedeel.
Die skool beplan om ’n gedenkdiens vir Chesnique te hou. Alle besonderhede kan op die skool se Facebook-blad gekry word.