Publications
Partners
Cape Town – IProgressive Professional Forum (PPF) “ayiphethwe noma ayitholi imali ngokungemthetho, noma ngokusemthethweni noma ngokuyimfihlo emndenini wakwaGupta,” isho kanjalo esitatimendeni ngoMsombuluko.
UMengameli we-PPF, uMzwanele “Jimmy” Manyi, nowake wakhulumela uhulumeni ngaphambilini, uphinde abe yinhloko yenqubomgomo kuBlack Business Council (BBC) futhi uphinde ahole inhlangano iDecolonisation Foundation.
Lezi zihlangano zihamba phambili ekufuqeni umkhankaso wokuba kube noguquko kwezomnotho eNingizimu Afrika kanti i-BBC yenze izethulo ngesonto eledlule ePhalamende nalapho iPhalamende belilalele ukuthi imboni yamabhange isihambe ibanga elingakanani kwezoguquko.
OLUNYE UDABA: UGordhan ‘udansela isiginci’ seDA ‘nongxiwankulu’ – PPF
Kodwa-ke ilokhu iqhamuke njalo imibuzo ngokuthi lezi zinhlangano ziyinikwa ubani imali, njengoba nelungu leDemocratic Alliance (DA), uDavid Maynier, efuna ulwazi ezinkampanini zikahulumeni kanye neminyango kahulumeni ukuthola ukuthi ubani ofaka imali kulezi zinhlangano.
Okwamanje, izimpendulo zasePhalamende ezanikezwa uNgqongqoshe wezamaBhizinisi kaHulumeni, uLynne Brown, kanye noNgqongqoshe wezoHwebo neziMboni, uRob Davies, mayelana nemibuzo kaMaynier, ziveze ukuthi uhulumeni ubelokhu efaka imali ku-PPF kanye ne-BBC.
UBrown udalule ukuthi u-Eskom kanye noTransnet banikele ngemali elinganiselwa ku-R840 000 ku-PPF, ekubeni uDavies edalule ukuthi uMnyango wezoHwebo neziMboni wanikeza iBBC imali engu-R7m eminyakeni emithathu eyedlule.
UMaynier ukugxeke kakhulu ukunikela ngalezi zimali kulezi zinhlangano, wathi izinkampani zikahulumeni akufanele zixhase “izinhlangano ezingene zagamanxa kwipolitiki futhi ezikhankasa ziphikisana noNgqongqoshe wezeziMali, uPravin Gordhan, kanye neHhovisi loMgcinimafa”.
