Durban - Ukuqubuka kwesifo isimungumungwane esifundazweni iKwaZulu-Natal kungakhula kakhulu njengoba abantu besaba ukusigomela.
Iziphathimandla zoMnyango wezeMpilo uthi lesi sifo singaholela ezifweni ezifana nobumpumputhe, ukuphazamiseka engqondweni kanye nokunye kanti nabantu asebekhulile bangabhekana nezinkinga.
Iphephandaba iNorth Coast Courier lithi isifunda iLembe sibike ngabangu-27 abanalesi sifo komasipala ababili abangaphansi kwalesi sifunda.
Isikhungo esibhekelele izifo ezisulelanayo sithi abaningi ababikwe ngokuba nalesi sifo ngabantu abalandela inkolo yamaSulumane.
Abantu abalandela le nkolo abavumelekile ukudla noma ukusebenzisa izinto ezenziwe ngenyama yengulube, kanti babenokukhathazeka ngokuthi imishanguzo esetshenziselwa ukugoma i-MeasBio® (Biovac) ithakwe nge-porcine gelatin, etholakala engulubeni.
OLUNYE UDABA:Kutholakale ukuthi akasenaso isifo umculi weGospel
Lesi sikhungo siveze ukuthi isishintshiwe le mishanguzo kanti futhi ayisakhiqizwa le eyayisetshenziswa kudala.
Omunye wodokotela abasebenzela eBallito, uDkt Dinesh Patel, uthe enye yezinto eyenza abazali basabe ukugoma izingane zabo wukuthi bakholwa wukuthi imishanguzo yokugoma iyona ebanga i-autism.
"Lokhu akulona iqiniso futhi kudala kwenziwa ucwaningo oluveza ukuthi imishanguzo yokugomela isimungumungwane ayibangi lesi sifo. Isimungumungwane sikhula ngesivinini uma kushintsha amasizini kanti singena kakhulu izingane ezinamasosha omzimba antekenteke," kusho uPatel.