Publications
Partners
Durban - UNobhala Jikelele we-ANC u-Ace Magashule umemezele esithangamini sabezindaba ngoLwesibili ntambama ukuthi i-NEC ye-ANC ithathe isinqumo sokufaka uMengameli Jacob Zuma amasondo.
Lesi siqiniseko siza ngemuva kokuhlawumbisela okuningi mayelana nekusasa likaMengameli Zuma.
UZuma kulindeleke ukuba aphendule kusasa, kanti uMagashule uthi abanazo ezinye izinhlelo uma uZuma engabaphenduli.
"Akukho okungalungile uZuma akwenzile, kepha sithathe isinqumo sokuthi kube nguCyril Ramaphosa ozothatha izintambo," esho.
OLUNYE UDABA: I-ANC inqume ukuketula uZuma
Iqembu eliphikisayo i-United Democratic Movement (UDM) izwakalise ukuthi iyasamukela isinqumo sokuketulwa kukaZuma njengomengameli wezwe.
"Kubathathe isikhathi eside nokho ukuthi bafinyelele kulesi sinqumo, yize kukade kwacaca ukuthi asimfanele lesi sikhundla asiqhoqhobele," kusho umholi waleli qembu esitatimendeni, uBantu Holomisa.
Uthe kucacele noma ngubani manje ukuthi i-ANC ithathe lesi sinqumo ngenxa yokwanda kwengcindezi eqhamuka kumaqembu ezepolitiki, izinhlangano ezimele umphakathi kanye nabezindaba ekutheni kukhishwe uZuma.
"Ingcindezi eqhamuka nxazonke itshengisa ukuthi intando yeningi, eshicilelwe kuMthethosisekelo, iyasebenza," esho.
Uthe i-ANC - ekade yaqala ukweseka uZuma - kumele ilungise lo monakalo ngokuthi ibeke uZuma nobhululu bakhe amacala.
