Kweqe iziboshwa ebezisanda kugwetshwa udilikajele ngawokubulala

Sekuvele imibiko ethi kweqe iziboshwa ezintathu ebezisanda kuthola isigwebo ngamacala okubulala ngemuva kokweqa zikade ziyovela eNkantolo eNkulu yaseGoli.

La madoda ayingxenye yesigejane samadoda amane abesanda kugwetshwa udilikajele ngoLwesine ngokubulala umndeni waseLawley, eningizimu yeGoli ngo-Agasti 2016.

Kuthiwa laba beqe ngesikhathi sebeyongena evenini ebezobahambisa ejele.

Imithombo esondelene nalolu daba itshele i-EWN ukuthi la madoda amathathu - abeboshwe ngamaketangu - akwazile ukweqa ngesikhathi evele enkantolo ngoLwesine.

OLUNYE UDABA: Kweqe 4 weziboshwa 'eziyingozi' ejele e-E London

Kukholakala ukuthi lezi ziboshwa ebese zilahlwe ngamacala, bezihlome ngezikhali okuyizo ezizisebenzisile ukuhlasela amaphoyisa abeziphelezela.

Lesi sigameko sesivuse ukwesaba kanye nemibuzo ngokuphepha okubandakanya iziboshwa ngenxa yokuthi lesi sehlakalo siza ngemuva kokweqa kweziboshwa ezingu-16 ejele eliseGoli.

Ezimbili kuzona zadutshulwa zabulawa KwaZulu-Natal.

Lezi ezinye ezingu-14 zisagcwele izigange.

UMnyango wezokuHlunyeleliswa kweziMlilo nowezobuLungiswa ubungakatholakali ukuba uphawule kulandela isigameko.