Namanje akukacaci ukuthi izokwethulwa nini i-SONA

Cape Town - Njengoba izwe lisadunguza ebumnyameni ngekusasa likaMengameli Jacob Zuma, namanje akukacaci ukuthi izokwethulwa nini inkulumo engesimo sezwe iState of the Nation Address(SONA).

Abezindaba ze-EWN bathole ukuthi amalungu e-South African National Defence Force (SANDF), abezobayingxenye yokuqapha lo mcimbi azolibangisa eKimberley lapho okuzobe kubanjelwe khona umgubho we-Armed Forces Day ngoLwesithathu oluzayo.

OLUNYE UDABA:I-ANC ibize umhlangano oyisipesheli weKhokhasi

Ngalo lolo suku kuzobe kulindeleke ukuba kwethulwe inkulumo yesabelomali ka-2018 ePhalamende.

Khonamanjalo, uhlelo lwasePhalamende lwangoLwesithathu seluphazamisekile ukuze kuzohlala umhlangano ophuthumayo wekhokhasi ye-ANC ePhalamende.

I-EWN iphinde yananela ngokuthi umhlangano wekhokhasi ye-ANC uzobe uhanjelwe nguMengameli weANC uCyril Ramaphosa, uNobhala Jikelele u-Ace Magashule kanjalo neSekela lakhe uJessie Duarte.

Kuthe ngoLwesibili ntambama, i-ANC yabamba isithangami sabezindaba yaqinisekisa ukuthi uKhongolose umfake amasondo uMengameli Zuma kulandela ukuthi enqabile ukwesula ngokwakhe esikhundleni.

Ukwethulwa kwe-SONA kwahlehliswa njengoba kwakulindeleke ukuba kube ngomhlaka-8 Febhuwari.