Publications
Partners
Johannesburg - Umdlali wasesiswini u-Oupa “Ace” Manyisa uthi isinqumo sokujoyina iMamelodi Sundowns wasithatha ngoba efuna ukukhula, azithuthukise njengomdlali futhi lokhu uzokwenza ngokusebenzisana neqembu elinogqozi nelizimisele ngokuwina yonke into.
UManyisa uchithe iminyaka cishe eyishumi ne-Orlando Pirates futhi wayisiza kakhulu ukuba ifike kowamanqamu we-Caf Champions League neConfederation Cup.
Yize bahluleka ukunqoba kulo mdlalo, uManyisa wayelokhu edlale njalo ngokuzimisela kwiligi kwazise nezakhe zakudala zazishanela nezindondo eziningi ngaleso sikhathi.
Lo mdlali uthi kubalulekile ukukhula uma ungumdlali futhi akakhathazekile ngokuthi kumele alwele udumo kuleli qembu eligcwele abadlali abadumile.
OLUNYE UDABA:UManyisa ubhoboka ngokulimaze iPirates
“Njengomdlali kumele ukhule, ngikhethe ukukhula ngokuthi ngibe lapha. Ngizokhula njengomdlali ngoba ngiyazi ukuthi kumele ngiqale phansi futhi ngilwele indawo yami kuleli qembu,” kusho yena.
Ngokubika kwephephandaba iSunday World, lo mdlali uthi lokhu kuyingxenye yempilo.
“Uma bengingafuni ukukhula njengomdlali, bengizosho ukuthi angifuni ukuya ndawo ngihlale lapho ebengikhona. Konke bekulula kimi kodwa ngithathe isinqumo sokuthi ngivulele abanye abadlali abasebasha isikhala ngingabavimbeli," esho.
