Cape Town – UNgqongqoshe wamaBhizinisi kaHulumeni uLynne Brown uthi wayengazi ukuthi u-Eskom wawuqamba amanga ngobudlelwane bawo neTrillian Capital Holdings.
Usebekele u-Eskom umnqamulajuqu wangoLwesine ukuba umtshele ngakho konke okwenzeka.
NgoMsombuluko kuvele ukuthi u-Eskom waqamba amanga ngesikhathi uthi imali engaphezu kuka-R1 billion eyawukhokhela inkampani esebenzisana neyakwaGupta yayisemthethweni.
UNgqongqoshe uBrown ubephambi kweStanding Committee on Public Accounts (Scopa) ePhalamende ngoLwesithathu ekuseni lapho i-SA Express ibichaza khona ngokuxhashazwa kwezimali nangokungahambisi izinto ngendlela efanele.
Kodwa wudaba oluthinta iTrillian obelufunwa yizintatheli ngesikhathi uBrown esephuma emhlanganweni.
OLUNYE UDABA: Akukaboshwa muntu ngokubulawa kwabantu ababili eKraaifontein
UBrown kodwa akabanga mude ngalolu daba.
Ngesikhathi ebuzwa ukuthi wayazi yini ngamanga, uBrown uthe “Cha”.
Ebuzwa ngezinyathelo azosithatha uma u-Eskom wehluleka ukumnikeza incazelo, uBrown uthe, “Ngilindele ukuba bahlangabezane nomnqamulajuqu abawubekelwe .”
Uthe ubengakasithathi isinqumo mayelana nokuthi kumele awudalule emphakathini yini umbiko wakwa-Eskom.