Die konstitusionele hof het Maandagoggend uitspraak gelewer in die Verkiesingskommissie se appèlaansoek om te keer dat oudpres. Jacob Zuma se naam terug op die MK-party se kandidatelys verskyn.
Die OVK het vroeër bevind art. 47(1)(e) van die Grondwet diskwalifiseer Zuma. Dit bepaal dat enigiemand wat skuldig bevind is aan ’n oortreding in die voorafgaande vyf jaar en tot langer as 12 maande tronkstraf gevonnis is, sonder die opsie van ’n boete, nie as LP mag dien nie.
Daarna het die kieshof bevind die vonnis van 15 maande tronkstraf sonder die keuse van ’n boete wat Zuma in 2021 opgelê is weens minagting van die konstitusionele hof, was nie ’n “vonnis” nie omdat hy nie die reg op appèl gehad het nie.