Die e-beursie-man Tiaan Lombard, wat aangevoer het dat hy as “fluitjieblaser” die vermeende diamantponzi-baas Louis Liebenberg aan die kaak gestel het, skuld na bewering miljoene aan twee feeseienaars en die Universiteit van Johannesburg (UJ) nadat hy geld wat hy op sy e-beursie-platform AE Switch ingesamel het, glo vir homself toegeëien het.
Lombard het na bewering vir Carine Crystil, eienaar van die geleentheidsmaatskappy Numinous 102, verliese van tot R600 000 laat ly nadat hy hom op die nippertjie as borg van haar Liplekker Fees op 9 Desember in Gqeberha onttrek het.
Crystil moes vanjaar tot haar motor verkoop om al die uitgawes te probeer delg.