Toe ’n Transnet-grootkop daarvan beskuldig is dat hy luukse woonstelle as gunsloon vir die toekenning van stewige staatskontrakte kry, het hy onmiddellik bedank.
Dít het Thabo Lebelo, voormalige eiendomshoof van Transnet, egter nie daarvan weerhou om net meer as ’n jaar later die leisels as uitvoerende hoof by nog ’n sukkelende staatsonderneming – die Vrystaatse Ontwikkelingskorporasie (VOK) – te neem nie.
Corruption Watch, ’n korrupsiewaghond sonder winsbejag, het dié aanstelling ondersoek nadat ’n fluitjieblaser gekla het, maar vandag – byna twee jaar later – ignoreer die VOK steeds pogings om antwoorde op die bewerings te kry.