Gebou stort ineen: 1 dood, 22 na hospitaal geneem

Minstens een sterfte is aangemeld nadat ’n woonstelgebou Maandag in George ineengestort het, terwyl 22 mense teen vroegaand uit die puin gered en na die hospitaal geneem is.

Die George-munisipaliteit sê in ’n verklaring ongeveer 70 bouwerkers was op die perseel toe die gebou, wat in aanbou was, omstreeks 14:00 ineengestort het.

Reddingswerkers van die munisipaliteit en distrik is ontbied, met 53 nooddienspersoneellede van Kaapstad en Worcester wat ook na dié deel van die Suid-Kaap op pad is.