In die lig van die Joshlin Smith-saak het sy haar kleindogter gemaan om nie meer laataand uit te gaan nie, maar haar waarskuwings het op dowe ore geval.
So vertel Yolanda Jansen (62), ’n ouma van Diazville in Saldanhabaai, nadat die naakte lyk van haar 19-jarige kleinkind verlede Vrydagoggend op die strand by Tabakbaai gevind is. Bloed het by haar oë en mond uitgekom.
Autumnsy Jansen was van kleins af lief daarvoor om rond te loop, sê ouma Jansen. Nadat sesjarige Joshlin op 19 Februarie by haar huis in Middelpos verdwyn het, het sy haar kleinkind telkemale gewaarsku: “Timsey, oe, my kind, as ek jou kon vasmaak. Watter dwaalloopgees is dit wat jy in jou het? Kyk hoe lyk die wêreld hier buitekant. Tot vandag toe weet ons nie waar is Joshlin nie.”