Die 21-jarige SW Nel het Sondag homself by uitgelese geselskap aangesluit toe hy die eindstreep eerste oorgesteek het in die eindronde van die 110 m-hekkies op die laaste dag van die Suid-Afrikaanse Atletiekkampioenskap in Pietermaritzburg.
Nel, ’n oudleerling van die Hoërskool Zwartkop in Centurion, het sy eerste nasionale senior titel ingepalm in 13.71 sekondes en in die proses met 0.02 op sy vorige persoonlike beste tyd verbeter wat hy die vorige dag opgestel het.
Hy is die seun van Wimpie Nel, self ’n tweemalige nasionale kampioen (1992 en 1993) in dié nommer en een van die land se voorste hekkies-afrigters.