.
.
Ondanks dit waaroor ons gewoonlik wanhopig voel, is daar mense soos sekere polisielede en fluitjieblasers wat in hul hoedanigheid as landsburgers optree teen georganiseerde misdaad, het Jeremy Vearey in ’n gesprek op die Suidoosterfees gesê. Murray La Vita doen verslag.
Die onderwerp van gesprek in die gespreksreeks van die Jakes Gerwel-stigting in Kaapstad was “Die Kaap van oorloë” waarin gefokus is op die oorloë wat in Kaapstad woed en hoe gesoute joernaliste en skrywers “verskeie misdade, organisasies en sindikate oopvlek wat dood en verwoesting in een van die wêreld se mooiste stede saai”.
Vearey, ’n skrywer en voormalige polisiegeneraal, het as gespreksleier opgetree. Hy het die joernalis en skrywer Rehana Rossouw gevra om te vertel hoe Fred Daniel besluit het om “buite die norm op te tree deur te besluit om as landsburger iets te doen”. Daniel figureer in haar boek Predator Politics: Mabuza, Fred Daniel and the Great Land Scam.
