Sy was maar eintlik nog altyd ’n dromer. As kind ook ’n regte-egte rabbedoe, dol oor diere en die buitelug. “My beste vriendin het op ’n plaas gewoon en om daar te kuier, was vir my wonderlik. Ek onthou hoe lekker ek altyd met die diertjies gespeel en dit verskriklik geniet het.”
Seker ook dié dat sy vandag nog haar werk as veldaanbieder so geniet. En dit bly steeds ’n absolute voorreg. “En om op hierdie stadium nog relevant te wees en ná 16 jaar steeds weekliks op TV te kan wees, ek weet maar alte goed dis nie ’n gegewe nie.”
Haar aanbiederswerk het al soveel geleenthede oor haar pad gebring. “Ek kan nie eers meer onthou wat ek al alles gedoen het nie. Dit het regtig my lewe verryk. Ook wie ek is gevorm. En dit het my geleer van dankbaarheid. Die mense wat jy ontmoet en met wie jy gesels. Dis nie kanse wat jy elke dag kry nie.”