.
.
Jy kan swéér jy het dit nog net met vriende en kollegas bespreek en dit nêrens op die internet op ’n soekenjin ingetik nie. Jy oorweeg dit om jou ou ryding vir ’n nuwe voertuig in te ruil en ewe skielik word jy met motor-advertensies op jou selfoon gepeper.
Hoe is dit moontlik dat bemarkers kon weet van die private gesprekke wat jy gevoer het? En dan spoel ’n koue, onaardige gevoel oor jou: Kan dit wees dat jou getroue digitale bondgenoot – jou selfoon – ’n luistervink is wat jou gesproke begeertes en behoeftes met maatskappye deel?
“Dis vreesaanjaend, nè?” sê dr. Tony Roberts, ’n genoot by die Institute of Development Studies (IDS) in Londen, Engeland, wat digitale regte in ontwikkelende lande navors, oor dié scenario. “Byna almal het dit al oorgekom en dan dink jy: Hoe het hulle geweet om die ding waarvan ek sopas gepraat het aan my te bemark?”
