.
.
Jeffreysbaai-toerisme, in samewerking met Fountains Mall, bied op Sondag, 31 Maart, ’n opwindende gesinsvriendelike Paasfees in die Tuin by Die Werf by Fountains Mall aan – propvol vermaak en lekkernye vir almal om te geniet.
Die hekke open om 10:00. Gesinne word genooi om hul piekniekkomberse, stoele, en sambrele saam te bring vir ’n ontspanne dag in die buitelug. Vir die jongspan is daar ’n gratis springkasteel om hulle te vermaak terwyl die volwassenes ontspan.
Vir diegene wat verkies om nie hul eie piekniekmandjie saam te bring nie, is daar ’n verskeidenheid kos- en koffiestalletjies beskikbaar om almal se smaakpapies te bevredig.
Een van die hoogtepunte van die dag is die optrede van Marie Bosman, ’n geliefde pastoor en bekende gesig van die TV-program The Real Housewives of Pretoria. Tussen 11:00 en 12:00 sal sy ’n inspirerende boodskap deel wat nie net die gelowiges sal aanspreek nie, maar ook ’n boodskap van liefde en hoop vir almal bied.
Die program is verder ryk aan vermaak vir die hele gesin, met ’n verskeidenhied van aktiwiteite wat aangebied word reg deur die dag.
Van ’n uitstalling deur die klassieke motorklub tot musiekvertonings deur die talentvolle kunstenaars van die Hoërskool Nico Malan se Innikollig produksies en dansoptredes deur lede van die Limitless Dance Studios onder leiding van Kirstin Rossi.
En asof dit nie genoeg is nie, kom die Paashaas self die kinders besoek om 12:30 en deel paaseiers uit vir ’n ekstra dosis pret en opwinding.
Die vermaak sal voortduur tot die hekke om 15:30 sluit.
Meer inligting
Die toegangsfooi is R80 per persoon en sluit toegang tot alle vertonings vir die dag in.
Kinders onder die ouderdom van 15 jaar geniet gratis toegang, maar moet onder die toesig van ’n volwassene wees.
Van die winste sal aan die nie-winsgewende organisasie, The Ladies Lighthouse in Jeffreysbaai, geskenk word.
Besoekers word versoek om nie hul troeteldiere saam te bring nie.
Vir meer inligting, skakel Jeffreysbaai-toerisme by 042 293 2923.
