Private kragverskaffing in Suid-Afrika het ’n nuwe tydvak betree toe ’n Oos-Kaapse vervaardiger in die motorbedryf ’n kragkoopooreenkoms met die kraghandelaar Etana Energy aangegaan het om tussen 50% en 70% van die krag te verskaf vir sy aanleg in Gqeberha.
Etana is nou die eerste private kraghandelaar in Suid-Afrika wat krag van verskeie opwekkers aankoop om aan verskeie gebruikers te verkoop. Tot dusver is dit meestal een koper, soos ’n groot myn, wat ’n kontrak aangaan met een opwekker.
Volgens Evan Rice, uitvoerende hoof van Etana, is die maatskappy tans in die eerste fase van die ontwikkeling van ’n groenkrag-nutsmaatskappy, as’t ware ’n mini-Eskom vir groenkrag.