Populisme en sensasie het net soos die verspreiding van waninligting en fopnuus geen plek in vanjaar se verkiesing nie, sê Mosotho Moepya, voorsitter van die Verkiesingskommissie (OVK).
Hy het politieke partye en onafhanklike kandidate Dinsdag gevra om hul beste voet voor te sit in die aanloop tot die verkiesing op 29 Mei.
Hy was aan die woord op ’n geleentheid in Kempton Park waar 51 van die 57 partye en kandidate wat aan die verkiesing in Gauteng deelneem, die gedragskode van die OVK onderteken het.