BOME gesnoei of vermink?
Die snoei van 50 jaar-oue bloekombome in Siebertstraat deur werkers van die Kouga-munisipaliteit verlede week, het Humansdorp-inwoners warm onder die kraag.
Inwoners meen munisipale werkers het sonder kundigheid of kundige toesig dié bome verniel.
“Dit is ’n skande. Die werkers het géén idee wat hulle doen nie,” sê ontstoke inwoner Kotie Oosthuizen. wat nie tuis was toe die snoeiery begin het nie. Hy en sy vrou, Estelle, het die erg ‘verminkte’ bome met hul terugkeer die aand ontdek.
Verskeie bome voor sy huis het in die slag gebly.
“Die takke is stomp afgesaag,” sê Oosthuizen wat sy eie tuindienste besit en al vir jare die bome snoei en die sypaadjie in stand hou. “Die bome is so verniel dat dit eintlik maar verwyder kan word.
“As die boomtakke probleme veroorsaak het, aan die elektriese drade geraak het, of ’n obstruksie was, sou ek verstaan, maar dit was nie. Ek sou verkies het dat die munisipaliteit my van die snoeiery in kennis gestel het sodat ek dit òf self kon doen, òf toesig kon hou.
“As hulle toegelaat word om takke voor die voet af te kap, hoe gaan die dorp lyk? Waar is die estetiese waarde?”
Oosthuizen voel dit is ’n bestuur-en-be-heer probleem - daar is geen opleiding nie.
“Dit is nie die einde nie. Volgens ’n munispale-werker gaan nóg bome in Humansdorop gesnoei word,” sê hy.
Kouga-munisipaliteit Infrastruktuur en Ingenieursporgefeulje Raadslid Freddy Campher, sê: “Die bome is uitheems en het tot so ’n mate gegroei dat hulle aan die elektriese drade geraak het. Nie net hou dit ’n brand-risiko in nie, maar dit kan ook die elektriese infrastruktuur beskadig en tot kragonderbrekings lei.
“Daar is geen onmiddellike planne om meer bome te sny nie, maar die munisipa-liteit sal bome sny wat die elektriese infrastruktuur in gevaar stel, om sodoende kragonderbrekings te verminder.
“Die aanvanklike snoei van bome is deur die elektriese afdeling gedoen, maar die munisipaliteit se skoonmaak- en parkspan sal die werk afrond en die betrokke gebiede opruim.”