Anne Taylor van Stellenbosch het in April 2018 vir die eerste keer met Skotland gaan kennis maak.
“Dit was nooit op my radar nie, maar ek het wel oor die jare in die Verenigde Koninkryk, Frankryk en ander dele van Europa gereis. Ek is nie die avontuurlustige soort nie, so ek hou daarvan om ’n dorp of plek se kunsgalerye te besoek, plaaslike kos te eet en die kultuur te ervaar en geniet!”
Haar mees onlangse besoek aan Edinburg was van Desember 2022 tot Januarie 2023 – haar heel eerste Kersfees in die Skotse hoofstad. “Dit was ysig koud met minus-temperature by tye, maar absoluut pragtig! Daar was Kersbome in elke venster en kranse op byna elke deur. Edinburg is ’n stad waar jy gemaklik kan stap en dit voel asof jy letterlik op iemand se voorstoep is. Die winkels is so pragtig. Alice kan letterlik in Wonderland verdwaal!”