Meer as 40% van die land se eiendomsagentskappe en byna die helfte van die 40 000 geregistreerde eiendomsagente se bedrywighede kan ontwrig word weens die regering se jongste swart-ekonomiese-bemagtiging (SEB)-vereistes wat hy op die private sektor afdwing.
Eiendomsagentskappe sal voortaan aan vlak 8-SEB-tellings moet voldoen om getrouheidsfondssertifikate te bekom of bestaande sertifikate te hernu. Sonder dié sertifikate kan eiendomsagente nie wettig sake doen nie.
Die vereiste telling is vir talle klein ondernemings onhaalbaar omdat dit neerkom op meer as 50% swart eienaarskap. Dit is onwettig, ongrondwetlik en skadelik vir die ekonomie, sê Piet le Roux, uitvoerende hoof van Sakeliga.